एजेन्सी
कतारको राजधानी दोहास्थित Embassy of Nepal in Doha ले स्वदेश फर्किन इच्छुक नेपाली नागरिकलाई आवेदन दिन आग्रह गरेको छ । दूतावासले विशेष सूचना जारी गर्दै कतारमा रहेका र विभिन्न कारणले नेपाल फर्कन चाहने नेपालीहरूलाई आफ्नो व्यक्तिगत विवरणसहित आवेदन पेश गर्न अनुरोध गरेको हो ।

दूतावासका अनुसार आवेदन दिने नेपालीहरूले आफ्नो नाम, राहदानी नम्बर, कतारमा बसोबास गरिरहेको ठेगाना, सम्पर्क नम्बर तथा स्वदेश फर्किन चाहनुको कारण स्पष्ट रूपमा उल्लेख गर्नुपर्नेछ। प्राप्त विवरणका आधारमा दूतावासले आवश्यक समन्वय, सहजीकरण तथा उद्धारसम्बन्धी प्रक्रिया अगाडि बढाउने जनाएको छ ।

दूतावासले विशेषगरी रोजगारी गुमाएका, स्वास्थ्य समस्या भोगिरहेका, आपत्कालीन अवस्थामा परेका वा अन्य कठिन परिस्थितिमा रहेका नेपालीहरूलाई प्राथमिकतामा राखेर सहयोग गर्ने जनाएको छ । साथै कतारमा रहेका सबै नेपालीलाई आधिकारिक सूचनामा ध्यान दिन र दूतावाससँग नियमित सम्पर्कमा रहन पनि आग्रह गरिएको छ ।

कतारमा रहेका नेपाली नागरिकको सुरक्षा, सहज फिर्ती र आवश्यक परामर्श उपलब्ध गराउने उद्देश्यले दूतावासले यस्तो पहल गरेको जनाइएको छ ।